Aonaid Tosaíochta Foghlama Shiobhán ATF 1: Cumarsáid, teanga agus litearthacht Gné: Caidrimh chumarsáideacha a fhorbairt Torthaí foghlama: 1.3 Dul i ngleic le gníomhaíocht a dteastaíonn comhaird le duine amháin nó níos mó lena haghaidh 1.7 Dul i ngleic le malartú suntasach le comhpháirtí cumarsáideach, agus taitneamh a bhaint as Léargas gearr ar roinnt gníomhaíochtaí teagaisc agus foghlama samplacha a chlúdaíonn an ghné seo Conair: Freagairt dó Ar bhonn seachtainiúil, glacann Siobhán páirt in Literacy Lift Off. Sna stáisiúin teanga, léitheoireachta, scríbhneoireachta agus léamhthuisceana, bíonn Siobhán páirteach in obair i ngrúpaí beaga. Soláthraíonn an obair i ngrúpaí beaga seo struchtúr don tsealaíocht, smaointe a roinnt, éisteacht lena piaraí agus caidreamh cumarsáideach a chur chun cinn. Tugtar tús áite d’úsáid teanga ó bhéal Shiobhán a uasmhéadú, agus spreagtar agus samhaltaítear scileanna comhrá sa ghrúpa. Tá scileanna cumarsáide ríthábhachtach do rannpháirtíocht agus gnóthachtáil agus áirítear leo scileanna gotha, ó bhéal, scríofa agus pictiúrtha. Síos tríd an gcuraclam, glacann Siobhán páirt in idirbheartaíochtaí bríocha le comhpháirtithe cumarsáideacha. Comhtháthaítear gníomhaíochtaí teanga ó bhéal i ngach réimse curaclaim. Cuirfidh sí tús aisti féin le hidirghníomhú lena piaraí agus le baill foirne a bhfuil aithne aici orthu. Lorgóidh sí daoine aonair go gníomhach agus tabharfaidh sí faoi idirghníomhaíochtaí bríoch leo agus is maith léi cuideachta a piaraí agus daoine fásta. Spreagtar Siobhán chun a teanga ó bhéal a úsáid in idirbhearta bríocha i réimse cásanna sóisialta, m.sh. am lóin agus am spraoi. Is maith le Siobhán a bheith ag éisteacht le scéalta lena piaraí agus freagraíonn sí go cuí nuair a chuirtear ceisteanna uirthi. Is maith le Siobhán a bheith ag obair lena piaraí agus freagraíonn sí go maith d’aiseolas dearfach. Tá scileanna airde Shiobhán ag feabhsú agus is maith léi bheith ag roinnt agus ag obair in éindí lena piaraí. Glacann sí páirt i ngníomhaíochtaí sealaíochta agus is minic a labhraíonn sí faoin méid atá ráite ag a piaraí. Atreisíonn an úsáid a bhaintear as pictiúir an timpeallacht foghlama agus tugann sé leideanna amhairc chun rochtain a fháil ar an gceacht. ATF 2: Uimhearthacht Gné: Tuiscint ar uimhreas a fhorbairt Torthaí foghlama: 2.13 Páirt a ghlacadh i ngníomhaíochtaí comhairimh 2.15 An caidreamh idir tacair agus uimhreacha a fhiosrú Léargas gearr ar roinnt gníomhaíochtaí teagaisc agus foghlama samplacha a chlúdaíonn an ghné seo Conair: Freagairt dó Oibríonn Siobhán i siopa na scoile go rialta, a thugann deiseanna fíorshaoil agus feidhmiúla di chun a tuiscint ar uimhreas a fhorbairt. Tá sí freagrach as gníomhaíochtaí stocáirimh lena n-áirítear na deochanna, seacláid, milseáin agus criospaí, srl., a chomhaireamh. Nuair atá an stoc á eagrú ag Siobhán don siopa tá an líon rudaí i sraith á gcomhaireamh aici. Tá sí in ann líon sraithe a shainaithint. Tá Siobhán in ann míreanna coibhéiseacha a mheaitseáil le sraitheanna neamh-choibhéiseacha le comhfhreagras ceann le ceann. Tá sí in ann péirí rudaí comhchosúla a mheaitseáil agus is féidir léi sraitheanna coibhéiseacha agus neamh-choibhéiseacha a mheaitseáil chun a tuiscint ar theanga na matamaitice ‘níos mó ná’, ‘níos lú ná’, ‘dóthain’, ‘an méid céanna le’ a leathnú i gcomhthéacs fhíorshiopa na scoile. I rith na ngnéithe seo de na ceachtanna, tá Siobhán ag foghlaim conas sonraí a aithint, a thaifeadadh agus a léirmhíniú. Atreisítear na ceachtanna trí cheist agus freagra iomlánach chun measúnú a dhéanamh ar thabhairt chun cuimhne agus tuiscint na téarmaíochta, na gcoincheap agus na húsáide matamaitice. Bíonn go leor deiseanna ag Siobhán a scileanna comhairimh a úsáid i rith a lae scoile. Úsáideann Siobhán cearnóg 20 le cabhrú léi uimhreacha suas le 20 a aithint, agus úsáidtear Numicon chun teagasc gníomhaíochtaí uimhreach agus comhairimh a atreisiú. Faigheann Siobhán deiseanna trí bheith ag obair go seachtainiúil i siopa na scoile chun a scileanna matamaitice agus an teanga matamaitice a úsáid sa saol laethúil ar bhealach feidhmiúil agus bríoch. Áirítear le foghlaim sa réimse seo aitheantas bonn, sóinseáil a thabhairt, sórtáil, meaitseáil agus tascanna réitigh fadhbanna praiticiúla, freastal ar chustaiméirí agus oibriú mar chuid d’fhoireann lena piaraí. Cruthaíonn sé freisin timpeallacht do dhearcadh dearfach i dtreo na huimhearthachta mar gur gníomhaíocht an-spreagthach é seo do Shiobhán. ATF 3: Cúram pearsanta agus folláine Gné: Cúram pearsanta agus sláinteachas Torthaí foghlama: 3.6 Comhoibriú le daoine fásta a chuireann tacaíocht laethúil ar fáil 3.7 Páirt a ghlacadh i ngnáthaimh chúraim phearsanta Léargas gearr ar roinnt gníomhaíochtaí teagaisc agus foghlama samplacha a chlúdaíonn an ghné seo Conair: Freagairt dó Leanann Siobhán gnáthaimh chúraim phearsanta laethúla, m.sh. scuabadh fiacla, scuabadh gruaige. Spreagtar í le bheith chomh neamhspleách agus is féidir chun na tascanna seo a chur i gcrích. Tá sí freagrach as táirgí cúraim phearsanta a bhailiú sula gcuireann sí a gnáthaimh chúraim phearsanta i gcrích. Léiríonn sí feasacht ar cé acu táirge cúraim phearsanta le húsáid agus tabharfaidh sí le fios cé acu ceann atá le húsáid. Tá Siobhán ag éirí feasach ar a bunriachtanais sláinteachais féin agus cleachtann sí na gnáthaimh seo a chur i gcrích ar bhonn laethúil. Mar chuid de bheartas cúraim dhlúthphearsanta na scoile, tacaíonn beirt bhall foirne le gach gnáthamh cúraim phearsanta. Comhoibríonn sí agus freagraíonn sí do ghnáthaimh rialta chun an leithreas a úsáid. Comhoibreoidh agus glacfaidh Siobhán páirt i ngnáthaimh gléasta agus díghléasta agus teastóidh roinnt leideanna ó bhéal uaithi chun na tascanna seo a chur i gcrích. Leanfaidh Siobhán gnáthamh níocháin lámh roimh ullmhú agus cócaireacht béile. Bíonn bród ar Shiobhán as a cuma agus bíonn sí sásta le moltaí a dhéantar faoina stíl ghruaige agus a cuid éadaí. Tá tuiscint mhaith ag Siobhán ar bheith ina cuid dá grúpa ranga agus de phobal na scoile agus comhoibreoidh sí leis na daoine fásta a thugann tacaíocht di. Freagraíonn sí do leideanna sóisialta agus gnáthaimh scoile agus tá sí in ann tascanna a dhéanamh sa rang agus ar scoil le tacaíocht chuí. Spreagtar í chun na rudaí is maith agus nach maith léi a chur in iúl agus roghanna a dhéanamh i rith an lae scoile. ATF 4: A bheith rannpháirteach i bpobal Gné: Áiseanna áitiúla a úsáid Torthaí foghlama: 4.11 Cuairt a thabhairt ar áiseanna agus páirt a ghlacadh in áiseanna a úsáid ina thimpeallacht 4.13 Roghanna a dhéanamh agus áiseanna áitiúla á n-úsáid m.sh. caiféanna áitiúla Léargas gearr ar roinnt gníomhaíochtaí teagaisc agus foghlama samplacha a chlúdaíonn an ghné seo Conair: Freagairt dó Is é fócas an churaclaim OSPS caidreamh dearfach leis an domhan agus le daoine timpeall orthu laistigh de chomhthéacs sóisialta níos leithne an phobail áitiúil a fhorbairt agus a chothú. Bíonn rochtain rialta ag Siobhán ar chaiféanna, bialanna, siopaí agus áiseanna spóirt áitiúla. Bhí Siobhán ina ball de ghrúpa a ghlac páirt rialta i gceachtanna leadóige ag an gcumann leadóige áitiúil. Comhdhlúthaíonn na gníomhaíochtaí pobalbhunaithe seo ar fad foghlaim Shiobhán agus tacaíonn siad lena cumas a cuid foghlama a ghinearálú i réimse suíomhanna difriúla. Tá Siobhán in ann a scileanna cumarsáide, a scileanna idirghníomhaithe shóisialta, a scileanna matamaitice agus a scileanna réitigh fadhbanna a úsáid. Tá sí in ann roghanna a dhéanamh nuair a bhíonn sí i gcaiféanna agus i mbialanna áitiúla agus í ag déanamh cinneadh maidir lena bhfuil uaithi. Tuigeann sí na rialacha sóisialta a bhaineann le fanacht agus tá sí an-chairdiúil agus tá suim aici sa domhan mórthimpeall uirthi. Tosaíocht do Shiobhán is ea rochtain a fháil ar chonláistí agus áiseanna áitiúla agus iad a úsáid chun tacú le foghlaim ar feadh an tsaoil agus conair do shaol mar dhuine fásta. Agus í ag dul chun cinn tríd an tsraith shinsearach, tiocfaidh méadú ar a rochtain ar an bpobal. Dírítear sa churaclam sinsearach laistigh den scoil ar dhul chun cinn a thaispeáint atá leabaithe sa tosaíocht a bhaineann le rochtain a fháil, páirt a ghlacadh agus cur leis an bpobal áitiúil ar bhealaí praiticiúla, bríocha agus spreagthacha. Cuireann na gnéithe seo ar fad le Siobhán a bheith ina saoránach gníomhach agus freagrach ar féidir léi cur go luachmhar lena scoil agus lena pobal i gcoitinne, agus páirt iomlán a ghlacadh i saol an phobail. ATF 5: Na healaíona Gné: Amharc-ealaín Torthaí foghlama: 5.7 Oibriú go neamhspleách agus/nó go comhoibritheach chun píosa ealaíne a tháirgeadh – Póstaer a chruthú do mhaidin caife tuismitheoirí don Nollaig Léargas gearr ar roinnt gníomhaíochtaí teagaisc agus foghlama samplacha a chlúdaíonn an ghné seo Conair: Freagairt dó Ghlac Siobhán páirt i bpóstaer a chruthú do mhaidin caife Nollag do thuismitheoirí. Le tacaíocht chun an clár bán idirghníomhach a úsáid, thángthas ar íomhánna ábhartha ar an idirlíon a bhaineann le maidin chaifé a reáchtáil, m.sh. cácaí, cupáin tae agus chaife, srl. Mar chuid de ghrúpa, rinneadh sraith colláisí agus taispeánadh iad ar fud na scoile chun an mhaidin chaife a fhógairt. Bhíothas an-chúramach agus na póstaeir á gcruthú agus ansin taispeánadh go mórtasach iad. Tugadh deis do Shiobhán sa topaic seo an domhan amhairc agus céadfach a fhiosrú trí réimse leathan ábhar amhairc agus tadhaill a úsáid. Chuir sé ar chumas Shiobhán a smaointe agus a mothúcháin a eagrú agus a chur in iúl i bhfoirm amhairc agus tadhaill. Déantar soláthar sa churaclam amharcealaíne d’eispéiris chruthaitheacha ag fiosrú, ag iniúchadh, ag turgnamh, ag dearadh agus ag úsáid raon meán le tacú le Siobhán chun tuiscint agus léirmhíniú a fháil ar an domhan amhairc agus chun léirthuiscint a fhorbairt dó. ATF 6: Corpoideachas Gné: Gluaiseacht chruthaitheach (damhsa) Torthaí foghlama: 6.17 An corp ar fad nó baill de a bhogadh go cruthaitheach mar fhreagairt ar spreagthach 6.18 Feasacht a fhorbairt ar chonairí agus treo na gluaiseachta Léargas gearr ar roinnt gníomhaíochtaí teagaisc agus foghlama samplacha a chlúdaíonn an ghné seo Conair: Tús a chur leis Forbraítear láidreacht agus folláine fhisiciúil na colainne tríd an gcorpoideachas agus tugann sé deis i gcomhair forbairt fhisiciúil ar fheasacht colainne, feasacht spásúil agus sábháilteacht. Is féidir leis an gcorpoideachas scileanna mínluaile agus scileanna oll-luaileacha, féinmheas, féinmhuinín, scileanna éisteachta, scileanna cluichí, cruthaitheacht agus an cumas le comhoibriú agus cumarsáid a dhéanamh le daoine eile a fheabhsú. Ar bhonn seachtainiúil, glacann Siobhán páirt i ranganna Zumba agus bíonn sí iomlán páirteach sna gnáthaimh dhamhsa. Freagraíonn Siobhán go maith don cheol agus d’fhuaim rithimeach an cheoil agus déantar gluaiseachtaí simplí le tondath rithimeach an cheoil. Tríd an damhsa, fiosraíonn Siobhán raon aclaíochta chun taithí a fháil ar an gcaoi a mbogann baill dá corp, feasacht spásúil agus gníomhartha coirp. Tacaíonn damhsa freisin lena cothromaíocht, comhordú agus taitneamhacht ag leibhéal céadfach. Freagraíonn sí do ghníomhartha a piaraí agus bealach intreach is ea an samhaltú piara le piara trínar fhoghlaim Siobhán roinnt gnáthamh damhsa. Léiríonn sí spéis in iarracht a dhéanamh gníomhartha léirithe a leanúint, lena mbaineann baill dhifriúla den chorp a bhogadh, m.sh. bualadh bos, lámha a luascadh, bogadh ó thaobh go taobh agus ó chlé go deas. Cuireann sí tús le réimse gníomhartha taistil, siúl, seasamh, fanacht i líne, leanann sí gníomhartha an teagascóra agus bhí a hiarrachtaí chun treonna taistil a athrú cuí. Léiríonn sí freagairt don ghluaiseacht a athrú idir leibhéil: seasamh, suí síos, lámha a chur díreach os cionn a cloiginn. Aclaíocht bhunúsach is ea an damhsa agus tá sé spleodrach, suaimhneach agus cuireann sé spraoi agus taitneamh ar fáil agus is bealach é chun smaointe agus mothúcháin a chur in iúl. Aidhm thábhachtach den churaclam damhsa is ea taitneamh a bhaint as oibriú le chéile agus freagairt do bhuille an cheoil. Léiríonn Siobhán taitneamh as a bheith ag obair lena piaraí i ngníomhaíocht chomhroinnte. Tugtar deiseanna sna ceachtanna seo do rannpháirtíocht do Shiobhán agus baineann sí an-taitneamh as an ngné seo den churaclam corpoideachais agus tá sí an-spreagtha aige.
