Clár Ardteistiméireachta dhá bhliain féinchoinnithe ar leithligh atá san Ardteistiméireacht Fheidhmeach atá dírithe ar mhic léinn a ullmhú don saol mar dhuine fásta agus don saol oibre. Tá sé mar chuspóir ag an gclár buanna gach mac léinn a aithint agus deiseanna a chur ar fáil um fhreagracht phearsanta, féinmhuinín agus féineolas a fhorbairt agus cabhraíonn sé le daltaí an méid a fhoghlaimíonn siad a chur chun úsáide sa saol mór.
Baineann ceithre bhloc leathbhliana a dtugtar seisiúin orthu leis an gclár dhá bhliain. Tugtar creidiúint don mhéid a bhaintear amach i ngach seisiún.
Cuirtear cúrsaí ar fáil i dtrí phríomhréimse:
- Ullmhú Gairme
- Oideachas Ginearálta
- Gairmoideachas
Bíonn roinnt modúl i ngach cúrsa. Tógann gach modúl leathbhliain le críochnú. Tá raon leathan de chúrsaí praiticiúla ar fáil chomh maith, a dtugtar speisialachais ghairme orthu agus ar féidir leis an dalta roghanna a dhéanamh iontu.
Déantar measúnú nuair a chríochnaítear na modúil agus tá scrúdú deiridh chomh maith i ngach ceann de na réimsí seo a leanas:
- Béarla agus Cumarsáid
- Dhá speisialachas gairme
- Feidhmiúcháin Mhatamaiticiúla
- Teanga
- Oideachas Sóisialta
Gheobhaidh mic léinn a n-éiríonn leo an clár a chríochnú go rathúil Ardteistiméireacht ón Roinn Oideachais agus Eolaíochta. Déantar an teastas seo a bhronnadh ag trí leibhéal:
| Leibhéal | Creidiúintí a Éilítear |
|---|
| Pas | 120-139 creidiúint |
| Moladh | 140-169 creidiúint |
| Gradam | 170-200 creidiúint |
Bronntar Taifead Taithí ar iarrthóirí a fhaigheann níos lú ná 120 creidiúint nó nach gcríochnaíonn an cúrsa.
Doiciméadú
Ráiteas um Chlár Ardteistiméireachta Feidhmí
Naisc ghaolmhara
An Ardteistiméireacht Fheidhmeach