Ina c(h)ur chuige do phleanáil drámaíochta sa seomra ranga, is gá don mhúinteoir roinnt ceisteanna a chur san áireamh:
- an comhthéacs ginearálta pleanála le haghaidh drámaíochta sa seomra ranga
- ábhar na drámaíochta sa ghearrthréimhse agus san fhadtréimhse
- comhtháthú drámaíochta le hachair eile churaclaim
- múineadh drámaíochta do ghrúpaí ilranga.
Comhthéacs ginearálta pleanála le haghaidh drámaíochta sa seomra ranga
Cuireann drámaíocht sa seomra ranga eispéireas ar fáil do pháistí a
- fhorbróidh a scileanna drámaíochta
- fhorbróidh a gcumas chun drámaíocht a úsáid chun cur lena n-eispéireas foghlama in achair eile curaclaim
- chuideoidh lena bhforbairt fhoriomlán.
Beidh gá le pleanáil fhadtéarmach agus ghearrthéarmach chuige seo a chomhshnaidhmfidh páirtíocht rialta le gach ceann de na cuspóirí ábhair sa churaclam drámaíochta agus a chinnteoidh go mbainfear úsáid chomhsheasmhach shamhlaíoch as na trí réamhriachtanas i bpróiseas na drámaíochta:
- ábhar
- an lionsa ficseanach
- cruthú timpeallachta sábháilte.
D'fhonn soláthar le haghaidh an leanúnachais a dheimhniú tá sé tábhachtach go gcuirfidh an múinteoir eispéireas na bpáistí sa drámaíocht roimhe seo san áireamh. Chuige seo beidh gá le dul i gcomhairle le múinteoir a mhúin na daltaí roimhe sin, mar aon le meá ar aon mheasúnú a rinneadh ar dhul chun cinn na bpáistí agus ar a n-eispéireas sa drámaíocht chun a leibhéal cumais agus a n-eispéireas in úsáid drámaíochta le haghaidh foghlama a dhéanamh amach.
Mar sin ba chóir go bpleanálfadh an múinteoir
- eispéireas chomh leathan agus chomh saibhir agus ab fhéidir a thabhairt do pháistí i ndrámaíocht ach é ag teacht lena gcéim forbartha
- an méid seo a shuíomh sna comhthéacsanna éagsúla d'obair na bliana, de thréimhsí roinnt seachtainí agus d'obair gach seachtaine
- cothroime a aimsiú idir gníomhaíocht bunaithe ar eispéireas, cúraimí agus ábhair mhachnaimh ghinearálta na bpáistí agus drámaíocht a éiríonn as agus atá comhtháite le hachair eile churaclaim.