Foramharc

Foramharc ar ábhar do ranganna naíonán go rang 2

Forbairt scileanna

Forbairt scileanna

• Cur i bhfeidhm agus réiteach fadhbanna
• Cumarsáid agus cur in iúl
• Comhtháthú agus nascadh
• Réasúnaíocht
• Cur i bhfeidhm
• Tuiscint agus tabhairt chun cuimhne

Foramharc ar ábhar do ranganna 3 go dtí 6

Forbairt scileanna

Forbairt scileanna

• Cur i bhfeidhm agus réiteach fadhbanna
• Cumarsáid agus cur in iúl
• Comhtháthú agus nascadh
• Réasúnaíocht
• Cur i bhfeidhm
• Tuiscint agus tabhairt chun cuimhne

Aidhmeanna

Is iad aidhmeanna churaclam matamaitice na bunscoile ná

• dearcadh dearfa i leith na matamaitice a fhorbairt mar aon le léirthuiscint ar a gnéithe praiticiúla agus aeistéitiúla
• cumas chun fadhbanna a réiteach a fhorbairt mar aon le héascaíocht in úsáid na matamaitice sa ghnáthshaol a chur chun cinn
• a chur ar chumas an pháiste teanga na matamaitice a úsáid go héifeachtach cruinn
• a chur ar chumas an pháiste tuiscint ar choincheapa agus ar phróisis mhatamaiticiúla a d'oirfeadh dá leibhéal forbartha is ábaltachta a bhaint amach
• a chur ar chumas an pháiste máistreacht a aimsiú ar úsáid scileanna bunúsacha matamaiticiúla agus ar mheabhrú bunfhíoras uimhris.

Cuspóirí ginearálta

Ach a c(h)umais dhúchasacha agus tosca athraitheacha a chur san áireamh, ba chóir go gcuirfeadh curaclam na matamaitice ar chumas an pháiste

Forbairt scileanna

• coincheapa agus próisis mhatamaiticiúla a chur i bhfeidhm agus réitigh ar fhadhbanna a phleanáil agus a chur i gcrích i gcomhthéacsanna éagsúla
• idéanna, próisis agus torthaí matamaiticiúla a chur in iúl ó bhéal agus i bhfoirm scríofa
• naisc mhatamaiticiúla a dhéanamh laistigh den mhatamaitic féin, ar fud ábhar eile léinn agus, freisin, in úsáid na matamaitice i gcomhthéacsanna praiticiúla laethúla
• réasúnú, iniúchadh agus hipitéisiú a dhéanamh i dtaca le patrúin agus coibhneasa sa mhatamaitic
• bealaí cuí oibre, idir bhealaí caighdeánacha agus bhealaí neamhchaighdeánacha, a chur i bhfeidhm agus uirlisí agus láimhseoga éagsúla a úsáid chuige sin
• téarmaíocht, fíorais, sainmhínithe agus foirmlí matamaiticiúla a thuiscint agus a thabhairt chun cuimhne

Uimhreas

• ionadluach sa chóras deichmhear (deachúlacha san áireamh) a thuiscint, a fhorbairt, agus a chur i bhfeidhm
• airíonna uimhris a thuiscint agus a úsáid
• nádúr na gceithre oibríocht uimhris a thuiscint agus iad a chur i bhfeidhm go cuí
• sracmheastachán, meastachán agus ríomhaireacht mheabhrach a dhéanamh agus bunfhíorais uimhris a thabhairt chun cuimhne
• na naisc idir codáin, céatadáin agus deachúlacha a thuiscint agus foirmeacha coibhéiseacha a aithris
• na coincheapa, na scileanna agus na próisis atá sealbhaithe aige/aici aúsáid i réiteach fadhbanna

Ailgéabar

• patrúin agus coibhneasa in uimhreacha a iniúchadh, a thabhairt faoi deara, a úsáid, agus a léirthuiscint
• slánuimhreacha deimhneacha agus diúltacha a aithint ar an uimhirlíne
• coincheap na hathróige a thuiscint agus luachanna a chur in áit athróg i bhfoirmlí, sloinn agus cothromóidí simplí
• fadhbanna de rá béil a aithris mar shloinn ailgéabracha
• tuiscint ar airíonna agus rialacha maidir le sloinn ailgéabracha a shealbhú
• cothromóidí simplí líneacha a réiteach
• na coincheapa, na scileanna agus na próisis atá sealbhaithe aige/aici a úsáid i réiteach fadhbanna

Cruth agus spás

• feasacht ar spásúlacht a fhorbairt
• airíonna línte, uillinneacha agus cruthanna déthoiseacha is tríthoiseacha a imscrúdú, a aithint agus a rangú agus cuntas a thabhairt orthu
• coibhneasa agus rialacha maidir le cruth a dhéanamh amach go neamhfhoirmiúil
• cruthanna déthoiseacha a chur le chéile, a theisiliú agus a fhoroinnt agus cruthanna tríthoiseacha a chur le chéile agus a fhoroinnt
• cruthanna déthoiseacha is tríthoiseacha a tharraingt, a thógáil agus a láimhsiú
• siméadracht i gcruthanna a aithint agus cruth agus siméadracht sa timpeallacht a aithint
• treo agus suíomh a chur in iúl go corplárnach (clé/deas, ar aghaidh/ar gcúl) agus trí chéimseata chomhordanáideach shimplí
• na coincheapa, na scileanna agus na próisis atá sealbhaithe aige/aici a úsáid i réiteach fadhbanna

Tomhais

• uirlisí oiriúnacha tomhais a aithint, a roghnú agus a úsáid
• fad, achar, meáchan, toilleadh agus meánluas a mheas, a thomhas agus a ríomh agus aonaid chuí thomhais, idir aonaid neamhchaighdeánacha agus aonaid mhéadracha, a úsáid
• uillinneacha, am, airgead agus scála a mheas, a thomhas agus a ríomh agus aonaid neamhchaighdeánacha agus aonaid chuí thomhais a úsáid
• tomhais i ngnáthúsáid laethúil a aithint agus a léirthuiscint
• na coincheapa, na scileanna agus na próisis atá sealbhaithe aige/aici a úsáid i réiteach fadhbanna

Sonraí

• sonraí a bhailiú, a rangú, a eagrú agus a léiriú ag úsáid ábhar nithiúil agus léiriúchán diagramach, grafach nó pictiúrtha
• táblaí, léaráidí, barra-chairteacha, picteagraim, línghraif agus píchairteacha a léamh, a chiallú, agus a anailísiú
• torthaí ar phróisis fhánacha shimplí a léirthuiscint, a aithint agus a chur in iúl
• seans a mheas agus a ríomh
• na coincheapa, na scileanna agus na próisis atá sealbhaithe aige/aici a úsáid i réiteach fadhbanna.